6 მაისს იაკობ გოგებაშვილის სახელობის თელავის სახელმწიფო უნივერსიტეტში სადაზვერვო არქეოლოგიური ექსპედიციის შედეგების პრეზენტაცია გაიმართა.
თესაუ-ს სტუდენტებმა, ისტორიის დეპარტამენტის ასისტენტის, არქეოლოგ გიორგი ლაღიაშვილის და ასისტენტ-პროფესორი დავით ჯავახიშვილის ხელმძღვანელობით, კისისხევის ხეობიდან თურდოს ხეობამდე არსებული გზა გაიარეს და აღნიშნულ ტერიტორიაზე არსებული სასულიერო და საერო ძეგლები შეისწავლეს.
პრეზენტაცია თელავის სახელმწიფო უნივერსიტეტის ჰუმანიტარულ მეცნიერებათა ფაკულტეტის ისტორიის სპეციალობის სტუდენტებმა: მაკა ბოტკოველმა და გიორგი მწყერაძემ გამართეს. როგორც ექსპედიციის წევრებმა განაცხადეს, აღმოჩენილი კერამიკის და სხვა სახის ნიმუშები იმაზე მიანიშნებს, რომ აღნიშნულ ტერიტორიაზე ნაქალაქარი არსებობდა.
ექსპედიცია 22 აპრილს დაიწყო და 4 დღის განმავლობაში მიმდინარეობდა. მასში, თესაუ-ს სტუდენტებთან ერთად, ივანე ჯავახიშვილის სახელობის თბილისის სახელმწიფო უნივერსიტეტის სტუდენტიც მონაწილეობდა.
პრეზენტაციას უნივერსიტეტის სტუდენტები, პროფესორ-მასწავლებლები და თვითმმართველი თემი თელავის მუნიციპალიტეტის კულტურის სამსახურის წარმომადგენლები დაესწრნენ.
ექსპედიცია თესაუ-ს დაფინანსებით და პროექტი ,,კარგი სახლის“ მხარდაჭერით განხორციელდა.
