23 სექტემბერს ფრანკფურტის ინტეგრაციული სკოლის პროფესორი ლუც კუნცი იაკობ გოგებაშვილის სახელობის თელავის სახელმწიფო უნივერსიტეტის საერთაშორისო ურთიერთობების სამსახურის თანამშრომლებს შეხვდა.
მხარეებმა ორმხრივი თანამშრომლობის შესახებ ისაუბრეს, რომელიც ერთობლივი პრაქტიკული და სამეცნიერო-კვლევითი პროექტების განხორციელებას ითვალისწინებს.
როგორც შეხვედრაზე აღინიშნა, სასწავლო-საწარმოო პრაქტიკა ფრანკფურტის ინტეგრაციულ სკოლაში თესაუ-ს განათლების ფაკულტეტის უმაღლესი საგანმანათლებლო პროგრამის სტუდენტებისთვის, ინკლუზიური განათლების მიმართულებით, მომავალშიც გაგრძელდება.
დღესვე ლუც კუნცი, თესაუ-ს საერთაშორისო ურთიერთობების სამსახურის წარმომადგნელებთან ერთად, უნივერსიტეტის განათლების მეცნიერებათა ფაკულტეტის დეკანს და პროფესორ-მასწავლებლებს შეხვდა. საუბარი სამომავლო თანამშრომლობის პერსპექტივებს და ამ კუთხით არსებულ პრობლემებს შეეხო.
იაკობ გოგებაშვილის სახელობის თელავის სახელმწიფო უნივერსიტეტსა და ფრანკფურტის ინტეგრაციულ სკოლას შორის გაფორმებულია მემორანდუმი, რომლის ფარგლებშიც, თესაუ-ს სტუდენტებმა სასწავლო პრაქტიკა გერმანიაში ერთი თვის განმავლობაში გაიარეს. ამავე პროექტის ფარგლებში, ფრანკფურტის ინტეგრაციული სკოლის დოქტორმა თესაუ-ს სტუდენტებისთვის საჯარო ლექციები ჩაატარა.
