13 დეკემბერს, იაკობ გოგებაშვილის სახელობის თელავის სახელმწიფო უნივერსიტეტში, კონფერენცია-„ციფრული აბორიგენები - ჩვენ ბუკელები ვართ ... ეპიზოდი მეორე“-ჩატარდა, რომელიც საჯარო სკოლების V-VI კლასების მოსწავლეთა საუკეთესო, ორიგინალური ნაშრომების წარმოჩენას ისახავდა მიზნად.
შეხვედრის დასაწყისში კონფერენციის ორგანიზატორმა, თესაუ-ს ზუსტ და საბუნებისმეტყველო მეცნიერებათა ფაკულტეტის ასოცირებულმა პროფესორმა, მარიამ ზაქარიაშვილმა, ღონისძიების დღის წესრიგსა და ამოცანებზე ისაუბრა.
კონფერენცია, რომლის თემატური მიმართულებები კომპიუტერული გრაფიკა, ელექტრონული, ანიმაციური პრეზენტაციები და Web-დიზაინი იყო, პლენარულ და სექციურ მუშაობას ითვალისწინებდა.
როგორც შეხვედრაზე აღინიშნა, კონფერენცია ხელს შეუწყობს მოსწავლეთა ციფრული ტექნოლოგიების გამოყენების უნარ-ჩვევების ამაღლებას და უნივერსიტეტისა და სკოლის ურთიერთთანამშრომლობის განვითარებას.
კონფერენციის მონაწილეები სერტიფიკატებით და სიმბოლური საჩუქრებით დაჯილდოვდნენ.
ღონისძიებას იაკობ გოგებაშვილის სახელობის თელავის სახელმწიფო უნივერსიტეტის რექტორი ირმა შიოშვილი, თესაუ-ს პროფესორები და საჯარო სკოლების პედაგოგები დაესწრნენ.
