იაკობ გოგებაშვილის სახელობის
თელავის სახელმწიფო უნივერსიტეტი
IAKOB GOGEBASHVILI TELAVI
STATE UNIVERSITY
პირველკურსელთა რეგისტრაცია იწყება!
თესაუს სტუდენტებმა მწვანე ტურიზმის თემაზე ENRICHER Hubs-ის ვორკშოპში მიიღეს მონაწილეობა

2025 წლის 1 ოქტომბერს იაკობ გოგებაშვილის სახელობის თელავის სახელმწიფო უნივერსიტეტის სტუდენტებმა მონაწილეობა მიიღეს ვორკშოპში „მწვანე ტურიზმის კონცეფციის შემუშავება სწავლის გზით“, რომელსაც თბილისში კავკასიის უნივერსიტეტმა Erasmus+ CBHE პროექტის — ENRICHER Hubs-ის ფარგლებში უმასპინძლა.

ვორკშოპის მიზანი იყო სტუდენტებისთვის მდგრადი ტურიზმის პრინციპების გაცნობა და მომსახურების დიზაინის, გუნდური მუშაობისა და პრობლემების გადაჭრის პრაქტიკული უნარების განვითარება. ღონისძიებამ სხვადასხვა ქვეყნის სტუდენტები და ადგილობრივი თუ ევროპული უნივერსიტეტების წარმომადგენელი მენტორები გააერთიანა.

ENRICHER Hubs-ის პროექტის წარდგენის შემდეგ მონაწილეებმა განიხილეს ტურიზმის მდგრადობის საკითხები, მდგრადი განვითარების მიზნებთან დაკავშირებული ინდიკატორები და ტურიზმის ეკონომიკური, გარემოსდაცვითი და სოციალურ-კულტურული გავლენები.

თესაუს სტუდენტები ჩაერთნენ ჯგუფურ აქტივობებში, რომლებიც მოიცავდა:

·        ქუთაისის მაგალითზე ტურიზმის დადებითი და უარყოფითი გავლენების ანალიზს;

·        მომსახურების დიზაინის პრინციპებისა და მომხმარებელზე ორიენტირებული კვლევის მეთოდების გაცნობას;

·        თელავის მაგალითზე ტურიზმის გამოწვევების შესწავლას „კვლევის კედლის“ მეთოდის გამოყენებით;

·        ინოვაციური იდეების შემუშავებასა და წარდგენას, რის შემდეგაც მონაწილეებმა ადგილობრივი და ევროპელი მენტორებისგან უკუკავშირი მიიღეს.

თელავის ტურისტულ გამოწვევებზე მუშაობამ თესაუს სტუდენტებს შესაძლებლობა მისცა, მიღებული ცოდნა ადგილობრივ კონტექსტთან დაეკავშირებინათ და ემსჯელათ, როგორ შეიძლება მდგრადმა, მომხმარებელზე ორიენტირებულმა მიდგომებმა ხელი შეუწყოს რეგიონში ტურიზმის განვითარებას.

ვორკშოპი დასრულდა ENRICHER Hubs-ის ფარგლებში დაგეგმილი მომდევნო აქტივობების მიმოხილვით, მათ შორის — მომსახურების დიზაინის კურსისა და მწვანე ტურიზმის ბიზნესგამოწვევების განხილვით.

ღონისძიებაში მონაწილეობა ეხმიანება თესაუს მისწრაფებას, ხელი შეუწყოს პრაქტიკულ, სტუდენტზე ორიენტირებულ სწავლებას და მოამზადოს ახალგაზრდები მდგრადი ტურიზმის განვითარებაში წვლილის შესატანად. ვორკშოპი ასევე მნიშვნელოვანი შესაძლებლობა იყო საერთაშორისო გამოცდილების გაზიარების, თანამშრომლობისა და განსხვავებული ხედვების გაცნობისთვის.

 
მნახველთა რაოდენობა: 48