თელავის სახელმწიფო უნივერსიტეტში ქართულ ენაში მომზადების საგანმანათლებლო,  „1+4 პროგრამის“ სტუდენტებისათვის  სტაჟირების პროგრამის პრეზენტაცია გაიმართა. პრეზენტაციას შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის წარმომადგენელი აიაზ მამედოვი წარუძღვა. აიაზ მამედოვმა სტუდენტებს სტაჟირების პროგრამის დეტალები გააცნო და მათ კითხვებს უპასუხა.  2018 წლის შემოდგომის მიღებისათვის ვაკანტური  500 ადგილია გამოყოფილი. მსურველებს განაცხადების მიღება 22 ოქტომბრამდე შეუძლიათ.

ეთნიკური უმცირესობების წარმომადგენლებისთვის განკუთვნილ პროექტს    შერიგებისა და სამოქალაქო თანასწორობის საკითხებში სახელმწიფო მინისტრის აპარატი საქართველოს გაეროს ასოციაციასთან და საჯარო სამსახურის ეროვნულ ბიუროსთან ერთად ახორციელებს. მისი  მიზანია ახალგაზრდების დასაქმების წახალისება, მათი ჩართულობისა და სამოქალაქო ინტეგრაციის ხელშეწყობა.   

პროექტი 2017 წლიდან ხორციელდება და „1+4 პროგრამის“ სტუდენტებს სახელმწიფო უწყებებში, 1-დან 6 თვემდე სტაჟირების  საშუალებას აძლევს.