10 ოქტომბერს, ფსიქიკური ჯანმრთელობის საერთაშორისო დღესთან დაკავშირებით, თელავის სახელმწიფო უნივერსიტეტის ფსიქოლოგი სტუდენტებს შეხვდა. შეხვედრა თესაუს ახლად შექმნილ სტუდენტთა ფსიქოლოგიური დახმარების ცენტრში, ევროკავშირის მიერ დაფინანსებული ერასმუს+ საერთაშორისო პროექტის, E-PSY-ის ფარგლებში გაიმართა. თესაუს ფსიქოლოგი ია ჩაქიაშვილი, სტუდენტების საჭიროებებს გაეცნო და მათ პრაქტიკული რჩევა-დარიგებები მისცა.
E-PSY პროექტის მიზანია სტუდენტებისთვის სოციალური და ფსიქოლოგიური დახმარების გაწევა საქართველოს უმაღლეს სასწავლებლებში, ფსიქოლოგიური კონსულტაციების ცენტრების შექმნის გზით; ფსიქიკური ჯანმრთელობის შესახებ სტუდენტებისა და, ზოგადად, ფართო აუდიტორიის ცნობიერების ამაღლება.
პროექტი 2021 წლიდან ხორციელდება და მასში ქართულ უმაღლეს სასწავლებლებთან ერთად ბიდგოშჩის ეკონომიკის და ტრანსილვანიის ბრასოვის უნივერსიტეტებიც არიან ჩართულნი. პროექტი 2023 წელს დასრულდება.
