იაკობ გოგებაშვილის სახელობის თელავის სახელმწიფო უნივერსიტეტის საერთაშორისო ურთიერთობების სამსახურის უფროსი, თამარ ასლანიშვილი, სამუშაო შეხვედრის ფარგლებში, საფრანგეთში, ავინიონის უნივერსიტეტში და ორენჯის მეღვინეობის სკოლაში იმყოფებოდა.
თესაუს პროფესორს საშუალება ჰქონდა, უნივერსიტეტისა და სკოლის ლაბორატორიები დაეთვალიერებინა და ტურიზმისა და მევენახეობა-მეღვინეობის მიმართულებით, სამომავლო აქტივობები დაეგეგმა.
ავინიონსა და ორენჯში შეხვედრას ორივე უმაღლესი სასწავლებლის საერთაშორისო ურთიერთობების სამსახურის უფროსები, პროფესორები, სკოლის პედაგოგები და სტუდენტები ესწრებოდნენ.
შეხვედრაზე, რომელიც პროდუქტიულობით გამოირჩეოდა, ურთიერთთანამშრომლობის მემორანდუმი მომზადდა. თელავის სახელმწიფო უნივერსიტეტი ორენჯთან და ავინიონთან ორი სხვადასხვა მიმართულებით იმუშავებს: ერთობლივი პროგრამის შემუშავებისა და სტუდენტებისა და აკადემიური პერსონალის გაცვლის მიმართულებით, უნივერსიტეტთან, ხოლო სტუდენტების სტაჟირებაზე, გაცვლის მიმართულებით, ორენჯის სკოლასთან.
